Տակավին վերջերս շրջափակման պայմաններում կյանքից հեռացավ ԱՀ ԳՄ երկարամյա նախագահ ՎԱՐԴԱՆ ՀԱԿՈԲՅԱՆԸ: Նրա գրչընկերներից շատերը հնարավորություն չունեցան իրենց վերջին հրաժեշտը տալ մեծանուն գրողին: Օրեր առաջ ԱՀ ԳՄ նախագահ ընտրվեց գրող, հրապարակախոս, ՀՀ և ԱՀ ԳՄ անդամ Նորեկ Գասպարյանը:
Չնայած հետպատերազմական դժվարություններին և ավելի քան չորսամսյա շրջափակմանը, Արցախում գրական կյանքն ընթանում է իր բնականոն հունով:
«Իրավունքը» արցախյան գրական կյանքի, շրջափակման ստվերոտ կողմերի, մեր օրերի մտավորական հանրույթի մասին զրուցել է ԳՄ նորանշանակ նախագահ ՆՈՐԵԿ ԳԱՍՊԱՐՅԱՆԻ հետ:
— Պարոն Գասպարյան, Ձեզ բաժին է հասել ծանրագույն ժամանակներում Արցախի Գրողների միության գործունեությունը համակարգողի, կազմակերպողի նույնքան ծանր ու պատասխանատու առաքելությունը: Ի՞նչ պետք է անել առաջին հերթին:
— Շարունակելու ենք կիսատը: Տարիների ընթացքում ձևավորված ավանդույթները ապրելու իրավունք են վաստակել: Գրական քաղաքականությունը պիտի նկատելի լինի, գրող մարդու հեղինակությունը՝ բարձր, ձայնը՝ լսելի: Հեռուներին պետք է համոզել, որ Արցախ աշխարհում ևս արարվում են գրքեր, որ Արցախում իր գոյի համար ամեն օր կռիվ տվող պոետի ձեռքը Երկիր մոլորակի զարկերակին է, հայացքը՝ գրի տիեզերական, դեռևս չնվաճված, կուսական տարածքներում, միտքը՝ որոնումի ճանապարհին: Դառնամ Աստվածաշնչին՝ բերքն առատ է, մշակը՝ պակաս…
— Չնայած ամոթալի պարտության, ամիսներ շարունակվող շրջափակման տված հուսախաբություններին, իրար հերթ չտվող թնդանոթների «համանվագի» ներքո էլ գրական կյանքը կանգ չի առնում: Գրականությունը կարո՞ղ է հաղթել պատերազմին:
— Կորցրածի ցավը ծանր շղթա է մեր մտքի ու բանականության վրա: Այն գիշատիչ է… Իսկ երբ ամեն օր ու ժամ հոշոտվում ես, չես կարող գուշակել, թե ինչ է կատարվում իրականությունից անդին, չես կարող ինքնամոռաց հիանալ անձրևի ու ձյան գեղեցկությամբ, վայելել գույների խաղը, տեսնել քեզ սպասողին ու քեզ մոտ աճապարողին: Ցավի մեջ նույնիսկ կարոտն է պռատ: Մի ժամանակ ապրածդ ու տեսածդ անընդհատ հետևում է քեզ, խառնում իրականն ու անիրականը և մեղադրում, մեղադրում, մեղադրու՛մ…
Ես ամեն գիշեր Շուշիում եմ, Տյաքում, Թալիշում, Հադրութի նեղլիկ փողոցներում, Ծար գյուղում, Լևում, Հանդաբերդի պարիսպների վրա… և ինձ տուն տանող չկա… Ես դարձել եմ գիշերային թափառական՝ անհանդերձ, անցուպ, անգաղափար… Տարիներ առաջ գրել էի՝ հեքիաթի երեք ճանապարհից ընտրում եմ չորրորդը… և ինձ ամենևին էլ չի հետաքրքրում, թե ինձ ուր է տանելու այդ ճանապարհը: Հնարավոր է՝ ոչ մի տեղ:
Թվում է՝ բոլորը կորցրել են բանականությունը, միտքը մթագնել է: Մարդը մարտահրավեր է նետել Տիրոջը, և, չեմ կարծում, թե Տերը կների մեզ, ինչքան էլ ոտաբոբիկ հասնենք ու ծնկի գանք ՆՐԱ առաջ, ինչքան էլ ապաշխարենք:
— Ասում են՝ ծանր ժամանակներում հեշտ է գրվում: Որպես անհատ գրող՝ տպավորություն է առաջանում, որ հատկապես վերջերս Ձեր ամեն բառը ծնվում է մեծ տառապանքի գնով: Ինչու՞ է հիասթափության ցավն այդքան ակնառու Ձեր տողերում:
— Թույլ տուր հակառակն ասել: Այլ իրականության մեջ հնարավոր չէ ապրել: Չեմ կարողանում մոռանալ, պատերազմից հետո քաղաքում թափառում էին հարյուրավոր ձիեր: Նրանք փողոցներում էին, զբոսայգիներում, բակերում… Քաղաքում ո՛չ ծաղիկ էր մնացել, ո՛չ կանաչ: Նրանք եկել էին մեր կորցրած գյուղերից և փնտրում էին իրենց տիրոջը՝ ամենևին էլ չգուշակելով, որ մնացել են անտեր…
Գեղարվեստը ուրախ կամ տխուր չի լինում: Միայն պայծառ գույները չեն, որ ապրեցնելու առաքելություն ու զորություն ունեն: Մարդ արարծն էլ միշտ չէ, որ ուրախ է: Սելավ էլ կա, արև էլ, սառնամանիք, մառախուղ: Կարո՞ղ ես կեղծել ինքդ քեզ, սուտ պատմություններ հորինել, ժխտել չարչարանքը, մերժել ապրածդ ժամանակը: Չգիտեմ ՏԱՊԱՆԻ մե՞ջ եմ, թե՞ ՏԱՊԱՆԻՑ դուրս, և ով է ընտրություն կատարողը:
Իսկ ամբոխը շարունակում է ընտրել Բարաբային…
— Վերջերս գրականության հետ որևէ աղերս չունեցող ոչ գրական ինքնակոչեր մեկը մյուսի հետևից հրատարակում են անբովանդակ գրքեր, որոնք գեղարվեստական սպասելիքների առումով ոչինչ են: Ի՞նչ պետք է արվի այն դեպքում, երբ վերջիններս հովանավորվում են Գրողների միությունից:
— Իսկապես, խոտանը, չբանաստեղծությունն ամենուր են: Այն տպավորությունն է, որ մարդիկ ժամանակակից երևալու մոլուցքից կորցրել են ինքնակառավարումը: Մեր աչքի առաջ կյանքը դուրս է մղվում արվեստից, կտավը, երգը, բանաստեղծությունը հաճախ խառնածին են և ծնվում են մահացած: Ապաշխարանքը բացակայում է, գենետիկ շարունակություն չկա, և բոլորն իրար նման են:
Եվ ցավալին այն է, որ այդ ընթացքը հնարավոր չէ վերահսկել, խոսքս, իհարկե, չի վերաբերում ԳՄ միջոցներով ու երաշխավորությամբ հրատարակվող գրականությանը: Այստեղ վիճակն այնքան էլ ողբերգական չէ, այստեղ գրականություն, կարծում եմ, մատուցվում է, ուղղակի չափորոշիչները կարելի է ավելի խստացնել: Բայց, ընդհանուր առմամբ, զարմանալի ոչինչ չկա, միշտ էլ այդպես է եղել, միայն ժամանակն է, որ ամեն ինչ խնամքով ու բծախնդրորեն դասավորում է համապատասխան արկղերում ու դարակներում: Բայց չես կարող չտեսնել ՆՐԱՆ, այն եկողին՝ նոր հանդերձով, նոր մտածողությամբ, նոր տարածք գրավելու անզուսպ ցանկությամբ… մեր ԳԱՆԳՐԱՀԵՐ ՏՂԱՆ:
— Ի՞նչ գեղարվեստական ակնկալիքներ ունի Արցախի ընթերցասեր հասարակությունն իր ժամանակի գրողից:
— Ինչպես միշտ՝ հասուն գրականություն: Պարզունակ բան եմ ասում, բայց ուզում է ինքն իրեն տեսնել այնտեղ: Չհանդիպեց՝ չի ընդունի: Եվ գրողը դառնում է անցյալի, կաղապար-ավանդույթի, ժամանակից խռով արժեհամակարգի, իր կողքին ապրողի պատանդը, ամեն մի օրը շնորհ համարող հանրությունը գրողին զրկել է ազատ տեղաշաժվելու իրավունքից: Ցավալի է խոստովանել, բայց պոեզիան պահանջարկ չունի, և մենք ամեն օր տարածք ենք կորցնում, մենք ամեն օր դավաճանում ենք գրականությանը:
— Թյու՞ր է, արդյոք, կարծիքը, որ հայ մտավորականությունը որդեգրել է կրավորական կեցվածք՝ դժվար ժամանակներում ժողովրդին առաջնորդելու փոխարեն:
— Սովետմիությունում երեք դասակարգ կար՝ բանվոր դասակարգ, գյուղացիություն և մտավորականություն: Գերտերությունը քանդվեց՝ դասակարգերն էլ հետը: Բանվորը դարձավ գյուղացի, գյուղացին՝ բանվոր, մտավորականությունը՝ քաղաքական գործիչ: Հետո էլ բանվորը դարձավ քաղաքական գործիչ, գյուղացին՝ կուսակցապետ, մտավորականը՝ բանվոր-գյուղացի: Որովհետև, գուցե մի քիչ տխուր բան եմ ասում, այդ մտավորականությունը չգիտեր ում առաջնորդել: Սարը բարձրանալու խիզախությունը լքել է բոլորին… հոտը մնացել է անպատվիրան… տասից՝ ոչ մեկը… Նյութը քարուքանդ է արել արժեհամակարգը: Բոլորն իրար մեղադրում են, ազնիվ ու արդար մեկը չկա, բոլորը առաջնորդ են փնտրում, որպեսզի մի օր քարկոծեն…
— Ո՞րն է Արցախի ժամանակակից գրողի ուղերձն աշխարհին:
— Մի խանգարեք գտնել մեր ձիերը: Մի քանի օր առաջ նրանցից մեկն ինքնասպանություն գործեց՝ նետվելով հսկայական բեռնատարի անիվների տակ…
ՌՈՒԶԱՆՆԱ ԽԱՉԱՏՐՅԱՆ